喺美國,YouTuber Hannah Aylward同佢患有脊髓肌肉萎縮症嘅男友Shane Burcaw,早前結束4年嘅愛情長跑,共諧連理。二人喺Instagram同YouTube上載結婚照,點知引嚟大批網民留言惡意攻擊,指二人係假結婚,甚至質疑Hannah係為錢先同Shane結婚,其後Hannah發文回應,表示唔會理會呢啲閒言閒語,獲得唔少人讚好。

Shane患有脊髓肌肉萎縮症,由2歲開始就要靠輪椅代步。Hannah同Shane由2018年開始拍片放上YouTube,分享殘疾人士嘅生活,希望可以消除其他人嘅歧視目光。

今個月4日,Hannah同Shane喺屋企後院舉行簡單婚禮,其後將婚照同片段上載至Instagram同YouTube同親友分享,但引嚟大批網民冷嘲熱諷,有人形容佢哋嘅婚禮係笑話,又質疑Hannah係為錢嫁俾Shane,甚至有人話Hannah有另一個專門發生性關係嘅伴侶等等。

Hannah其後發文反擊,表示過去兩年經營YouTube頻道令佢明白到,永遠無可能開導到無一個人,無論做咩事都會有人無法理解,以前呢類留言會覺得好痛苦,但到咗而家就明白到理會呢啲人嘅留言係浪費時間。Hannah又補充,曾經以為結咗婚之後,其他人就會明白佢同Shane嘅感情係真嘅,佢表示而家唔會咁天真,但亦都唔會理呢啲閒言閒語,佢哋會繼續創作,繼續分享佢哋嘅故事,令更多人了解到殘疾人士都係值得信任嘅伴侶。

原圖:IG@hannahayl