相信大家都聽「貓屎咖啡」呢種咖啡,佢被譽為世界上最昂貴嘅咖啡。呢種咖啡係由麝香貓食完再排泄出嚟嘅咖啡豆製成,又名為「麝香貓咖啡」。最近亞洲善待動物組織(PETA Asia)喺Facebook專頁發佈影片,揭發原來生產過程非常殘忍!

亞洲善待動物組織去年派調查員,去到10間位於印尼峇里島、生產貓屎咖啡嘅麝香貓農場,發現啲麝香貓都被困喺狹小而且污糟嘅鐵籠裡面,有部分麝香貓因為被長期囚禁導致精神失常,甚至自殘。亞洲善待動物組織嘅片段又影到一隻麝香貓雙眼失明,但仍然被迫餵食同生產咖啡豆。

亞洲善待動物組織指,以往啲商人都會喺叢林檢取由野生麝香貓排泄出嚟嘅咖啡豆,雖然而家麝香貓已被列為瀕危保護動物,但有唔少不義商人就喺野外捉麝香貓返去飼養、生產咖啡豆,當佢哋老咗、無晒價值嘅時候,就會被遺棄到森林自生自滅,甚至賣到活體動物市場宰殺。但當地嘅導遊同遊客介紹貓屎咖啡嘅時候,仍然會訛稱咖啡豆係由野外撿取。

亞洲善待動物組織呼籲大眾,唔好購買以虐待動物得嚟嘅貓屎咖啡,而市面上仲有好多高質、唔傷害動物嘅咖啡豆供大眾選擇。

原圖:FB@PETA 亞洲善待動物組織