大家有無睇過《朱古力獎門人》(Charlie and the Chocolate Factory)嘅電影或者小說呢?喺美國,糖果公司Jelly Belly創辦人David Klein仿傚《朱古力獎門人》嘅情節,舉辦「黃金票券」活動,尋獲黃金票券嘅人即可獲得5000美元(大約38750港元)獎金,終極大贏家仲可以獲贈佛羅里達洲一間工廠。

David坦言係受到《朱古力獎門人》嘅啟發,希望喺自己退休之前舉行呢場尋寶遊戲!參加者可以喺活動頁面註冊,支付49.98美元(大約387港元),就可以獲得自己居住州份嘅謎語,尋找黃金票券,而名額每州只有1000個。

當參加者搵到自己居住州份嘅黃金票券之後,即可獲得5000美元獎金,另外仲可以參加終極尋寶,贏得一間糖果工廠!David表示而家各地嘅人都已經開始搵黃金票券,佢仲話:「我哋搵緊你呀,Charlie(《朱古力獎門人》入面嘅得獎男童)!」

原圖:Twitter@ABG_Marketplace