14歲嘅花樣年華,本應係盡情享受青春嘅年紀,但患上脊髓肌肉萎縮嘅賴君怡,就只能夠長期喺輪椅上度過,仲有醫生評估佢只可以活到18歲。睇住自己嘅生命一日日流失,賴君怡從來無因為呢個病而唔開心,反而覺得自己好好彩,能夠擁有編寫程式同畫畫嘅天分。佢夢想係有一日可以擁有自己設計嘅電腦遊戲,用埋自己繪製嘅插圖同配樂,仲話:「一日未達成目標,我一日都唔會放棄!」

脊髓肌肉萎縮,係一種由於脊髓內控制運動神經嘅前角質細胞退化而引致肌肉萎縮嘅疾病,患者身體各處肌肉會慢慢退化,行唔到路,連抬頭、轉身、坐直、咳嗽、吞嚥等簡單動作都好難完成。賴君怡半歲嗰陣已經唔能夠好似其他BB咁坐住或轉身,當時健康院剩係話可能係發展稍慢,無深究或跟進。直到賴君怡嘅情況持續,屋企人四出求醫之下先確診佢患有脊髓肌肉萎縮症。平常人感冒,食啲藥過幾日就會好,但一個嘅小小感冒就足以令賴君怡致命。

不過賴君怡從無因為呢個病而意志消沉,反而樂於學習、嘗試。佢鐘意RPG Game(角色扮演遊戲),對程式編寫、遊戲開發非常感興趣,更利用暑假嚟學習編碼。賴君怡話睇住自己好似砌積木咁砌到個遊戲出嚟真係好自豪,更表示之後想入讀香港科技大學,成為電腦遊戲開發者。屋企人亦從來無將賴君怡當係包袱,悉心照顧,再加上朋友嘅關愛,令賴君怡覺得自己並唔係一個可有可無嘅人,世上依然有好多人在意自己。所以,賴君怡希望可以繼續活下去:「就算只剩下雙眼,我都想留喺呢個世界!」

想睇多啲賴君怡嘅故事支持佢追夢可瀏覽https://www.lifewire.hk/tc/Causes-And-Campaign/Causes/Lai-Kwan-Yee.html

【文章及影片獲慈善機構《護聯網》Lifewire授權轉載】

圖:Lifewire