新冠肺炎疫情下,喺內地居住嘅港人返港需要接受檢疫,令一啲長期病患者難以返港求醫,跟進病症。政府早前就建議,委託港大深圳醫院為長居於內地嘅醫管局病人跟進診症。港大深圳醫院院長盧寵茂今日接受電台訪問時表示,現時仍然有待政府同醫管局決定,佢又提到希望可以喺病人同意下,透過「醫健通」電子健康紀錄系統取閱佢哋嘅病歷,醫院正同醫管局商討有關事宜。

政府估計現時廣東省內有1.8萬至3.8萬名醫管局嘅病人,盧寵茂今日接受訪問嘅時候就話,有唔少自今年2月之後,都未曾返香港,當中有部分人士有唔同嘅病痛,對因為疫情返唔到香港感到徬徨,有部分已經向港大深圳醫院查詢,睇下可唔可以去到醫院覆診。

盧寵茂指,港大深圳醫院係一間綜合性醫院,有唔同專科門診,而早前已經接受醫療券,讓住喺內地嘅港人喺深圳睇病。佢又話,醫院已經準備好,每年可以處理200萬名病人,但仍然等候港府嘅指示,包括病人需唔需要支付部分費用、有無限額等等,院方會盡量配合。

原圖:大公報