爬山並唔係四肢健全人士嘅專利,就算失去雙腿,一樣可以攀上巔峰!俄羅斯男子Rustam Nabiev原本係傘兵,但因5年前一場營房坍塌事故而失去雙腿,但佢並無因此意志消沉,近日佢以徒手攀爬俄國最高峰厄爾布魯士山(Elbrus),成為史上徒手登頂第一人!Rustam激動到流下男兒淚,不過佢話,佢唔係想向全世界證明啲乜嘢,只係想向自己證明自己。

厄爾布魯士山最高海拔有5642米,有人甚至認為佢係歐洲最高峰。據外媒報道,Rustam原本打算坐雪橇上山,但當佢爬到海拔4100米嗰陣就發現,地上凹凸不平,坐雪橇反而造成阻礙,於是決定改成徒手用冰斧一步一步移動。Rustam嘅身體雖然比一般人強壯,但單靠雙手攀登依然困難重重,佢中途試過喺雪地入面幾乎無法呼吸,直到見到滿天星空之中有一顆流星飛過,Rustam覺得呢個係一種叫自己繼續前進嘅信號,於是振奮精神,再次出發。

Rustam最後足足用咗15個鐘,攀登咗13公里,先登上厄爾布魯士山山頂,當下佢激動流淚,佢話:「我用雙手『走』了太長時間,我不想通過這個舉動向任何人證明任何事,我只想向自己證明自己。這不是什麼英雄主義,也不算什麼壯舉。」

圖:IG@rustam_nabiev92