被大火活活燒傷絕對係一件痛苦嘅事,而燒傷造成嘅創傷同心理陰影亦唔係咁容易好得返。美國一個7歲男童Deyvion,喺4個月大嘅時候被大火嚴重燒傷致毀容,好彩有位單親媽媽非但唔嫌棄Deyvion仲領養咗佢。Deyvion獲領養嗰日,當日喺火場救返Deyvion嘅消防員都嚟探望佢,令佢大為感動,立志大個咗要做消防員拯救生命。

2013年5月,美國密蘇里州(Raymore)一幢大廈發生大火,當時年僅4個月大嘅Deyvion喺BB床度被燒到重傷,雖然被消防員及時救出,Deyvion僥倖生存,但就被燒到毀容。憑住堅毅嘅意志,Deyvion挨過最艱難危險時期慢慢恢復健康。5年後,Deyvion遇到一位擁有兩個小朋友嘅單親媽媽Beth,仲成為佢哋屋企嘅一分子。Beth好鐘意Deyvion,將佢視如己出,仲話:「每個人都說他很幸運遇到我,其實是我很幸運能擁有他。」

就喺Beth領養Deyvion嗰日,當年參與救火行動嘅消防員都有到場支持,仲特登為Deyvion預備咗一件消防外套同帽。Deyvion話,當佢見到拯救佢嘅消防員嚟到屋企,佢幾乎喊出嚟,因為佢哋嘅出現對佢嚟講有好大意義,更形容嗰日係特別嘅一日。佢更表示:「我想做消防員,希望有一天能拯救生命。」

圖:FOX 4 News