香港戰前唐樓已經賣少見少,古物諮詢委員會剛剛通過位於上環蘇杭街112號,即百年老店「源吉林」盒仔茶店舖,評為一級歷史建築,為呢條有百多年歷史嘅街道,再添傳奇色彩。

望建博物館

今次被評為歷史建築嘅唐樓,樓高3層,隱身於高樓大廈群之中,格外突出。唐樓1889年落成,屬本港最早期的「背靠背」唐樓,「源吉林」在1923年購入現址的物業,一直經至今

源吉林第七代傳人源樂明接受圈傳媒訪問時表示,源吉林於1906年喺蘇杭街(當時稱為乍畏街)120-122開設分店,1923年搬至現址,多年來從未進行大裝修,令原本面貌得以保存。對於呢幢樓宇被列為一級歷史建築,佢表示歡迎:「其實家族大部分人都唔贊成賣咗呢幢建築,成為文物更加好,可以好好保存落嚟。」

源樂明仲話,佢早前已為樓宇進行有限度維修,可惜經歷年月洗禮,當中難免有啲破舊,例如大門兩旁對聯由於太過殘舊,幾個月前拆下復修。成為法定古蹟之後,佢希望可以得到資助,維修大廈外牆及內部嘅木樓梯等。佢仲話,打算未來改建成博物館,展示有關涼茶嘅物品。

賣顏料起家

依家嚟到源吉林,會發現仲有另一個名稱「源廣和」招牌,皆因源氏以賣顏料起家源吉林歷史可追溯到清道光年間,源氏三兄弟首先在佛山經營顏料店,後當時南海、佛山一帶爆發瘟疫,有感大眾可能錢買藥,所以希望製造一種價廉物美藥,造福大眾,最終研製出以「九蒸九曬」古法程序煉製茶葉,就係「甘和茶」,亦即我哋俗稱「盒仔茶」。後來源氏家族於1906年在香港開設分店,經營至今。

源氏來港後仍保留工業顏料生意,但由於源吉林涼茶銷情好,加上1890年開始,西方顏料漸漸盛行,因此後期店舖轉專營盒仔茶。現時上環店舖內,除咗保留銷售工業顏料「源廣和」招牌,店內展示陳列架上亦放幾盅硃砂。

對於涼茶嘅前景,源樂明表示樂觀:「涼茶在中國人心中始終根深蒂固,可惜以前咁多年無乜宣傳,所以近年我哋出茶包,因為茶包比較方便,適合年輕人。」

原名乍畏街

源吉林所處嘅蘇杭街,本身嘅歷史都好有趣,蘇杭街英文名Jervois Street,中英文名完全唔同原來背後有段古。1851年,上環街市一帶火警,數百間房屋燒毀,當時英國將軍William Jervois(威廉‧乍畏)負責災後重建總司令,於是最東一條新建街道就命名為乍畏街。

乍畏街當年臨海,很多國內商船都喺呢度上落貨,成為中國各埠貨物集散地,其中以絲綢布匹為主,自蘇州和杭州,所以華人習慣稱之為「蘇杭街」,加上「乍畏」二字用中文讀嚟唔太,所以1978年正式改名為蘇坑街,英文名維持不變,形成中英文名唔同嘅有趣現象

自從八九十年代製衣廠北遷,絲綢絨布需求減少,行業式微,蘇杭街嘅店舖亦愈嚟愈多元化,有售賣化妝品原料香、油、工業原料、米行、茶葉行、五金店、紅酒批發商、鮮花店,近年更多咗唔少好型格嘅Café延續早年繁華景象

圖:LOOOP.HK


今次被評為歷史建築嘅唐樓,樓高3層,喺1889年落成,源吉林在1923年購入現址,多年來從未進行大裝修,令原本面貌得以保存。


依家嚟到源吉林,會發現仲有另一個名稱「源廣和」招牌,皆因源氏係以賣顏料起家。


源吉林近年亦努力轉型,近期更推出口罩。


呢個天秤有相當歷史,下面嘅盅,就係當年裝硃砂之用。


二樓呢種玻璃窗花,真係好經典!


唔好以為地板舊到穿窿喎,原來以前為咗防盜,收錢之後就會由呢個窿吊上嚟。


地板上見到「祿」字同「壽」字,源樂明話:「福字仲搵緊。」


內部仍保留當年嘅灶頭,不過應該有三十年無用過啦!

保存得好好嘅木樓梯,源樂明話如果政府有資助,佢都會好好維修呢條木梯。

閣樓就係當年嘅賬房。

地下擺放咗一啲數簿,最早係1950年,「以前有啲更舊,不過因為無人打理,被白蟻蛙蝕,已丟掉咗。」源樂明無奈地說。


當年嘅廣告雕板,其中一款仲有超級英雄做吉祥物


源樂明源吉林第七代傳人


蘇杭街英文名係Jervois Street,中英文名完全唔同,原來背後有段古。


依家源吉林嘅招牌下面,仍然寫住乍畏街架!

有六十多年歷史嘅兆成行,都一樣好出名甚至連外國旅遊雜誌社評選為亞洲百間特色商店。


呢間面積好細嘅店舖,售賣香薰油、基底油、按摩油、化妝品原料及成品,真係乜都有。