喺新冠肺炎疫情期間,食肆限制堂食,唔少市民都會買外賣返office或者返屋企食,有部分市民就會自備餐盒,減少浪費即棄餐盒,但用完記得要清洗乾淨喇!市面上部分保鮮盒都會有一條膠邊,但往往好多人都洗漏呢條膠邊,早前有台灣電視台就做咗個實驗,發現保鮮盒使用一年之後膠圈嘅含菌量超過10億,膠邊3日唔洗霉菌亦會急增10萬倍,影響我哋嘅健康。

台灣東森新聞台早前喺民眾家中搵咗個已經用咗一年嘅保鮮盒,委託實驗室進行檢測,實驗室教授挑出膠邊採集樣本,利用檢測食品衞生嘅冷光儀,檢測細菌含量,發現膠邊嘅細菌含量「爆晒錶」,超過儀器嘅最大讀值10萬,保健及營養系暨研究所助理教授李政達粗略估計,膠邊嘅細菌數量至少超過10億。

報道指,保鮮盒頻繁使用,會令膠邊變硬,令膠邊同保鮮盒蓋之間出現縫隙,容易積藏食物殘渣同水份,如果清潔不當就會發霉,成為細菌溫床。報道又提到,如果膠圈3日唔洗,霉菌就會增加10萬倍,甚至釋出黃麴毒素,長期攝入會損害肝臟同腎藏,甚至誘發肝癌。

有專家建議,要經常挖出膠邊清洗,遇到頑固污漬就可以用梳打粉溝水清洗,同埋用牙刷擦乾淨,等到完全風乾先放回膠條。如果已經出現霉點,就要用稀釋漂白水浸洗,再用清水洗乾淨,確保無殘留。

原圖:百度