香港人口老化問題漸趨嚴重,認知障礙症患者亦逐步攀升。據衛生署統計,認知障礙症更加係2019年嘅七大死因之一。下個禮拜一(21號)係國際認知障礙症協會 (Alzheimer’s Disease International)訂立嘅世界認知障礙症日,為咗鼓勵大眾關注認知障礙症並及早預防,聖雅各福群會懷愛長者鄰舍中心邀請咗青年設計師胡瑋樂,以「腦力君」為主角,創作8款WhatsApp貼圖,教大家預防認知障礙症。

雖然宜家暫時未有根治認知障礙症嘅方法,但就可以預防,8個「腦力君」貼圖分別代表8個預防認知障礙症嘅健康生活習慣,包括:

1.多運動。每星期做不少於150分鐘嘅帶氧運動,持之以恆唔單止可以預防認知障礙症,身體都好啲呀。

2.健康飲食。多菜少肉,均衡飲食。 

3.不吸煙。無論係一手煙定二手煙,都係引致認知障礙症嘅高風險因素,為人為己,煙民們都係戒煙喇。

4.控制體重。體重過輕或過重,都有患上認知障礙症嘅風險,千祈唔好盲目減肥呀。

5.控制三高。高血壓、高血脂、高血糖會導致中風,增加血管性認知障礙症嘅風險。

6.多動腦。學習新事物、做認知訓練等,都可以刺激大腦,防止認知功能退化。

7.保持社交。多啲參加社交活動,同人傾下偈,大腦都醒神啲。

8.保持愉快心境。要識得令自己「快樂」,保持正能量。

圖:聖雅各福群會提供