大腸癌係本港致命癌症之一,醫治早期消化道癌症可使用內鏡黏膜下剝離術(簡稱ESD),嚟保留病人完整嘅器官,但其操作技術要求較高,有一定程度嘅手術風險。為此,香港中文大學醫學院同新加坡合作,開發第二代機械人內鏡平台EndoMaster EASE系統,提升ESD手術嘅安全度同成效,治療消化道癌症。

ESD屬於創傷性較低嘅手術,可以將成塊附於黏膜嘅病變組織,連同周邊邊緣同黏膜下嘅病變組織一併切除,徹底根治癌症,減低復發機會。不過,ESD手術時間長,唔容易學習同操作,如果由經驗較淺嘅內鏡技師操作嘅話,可能會增加手術期間腸道流血、穿孔嘅風險。故此由2010年起,中大醫學院就同新加坡合作開發機械人內鏡平台,翌年更成功運用第一代技術雛型進行內鏡手術機械人ESD,治療早期胃道癌。

而最近開發嘅第二代機械人內鏡平台EndoMaster EASE系統,配置咗內鏡系統,配有兩隻裝上微型抓手同微型切割刀嘅伸縮機械臂,可同時拉高切割平面同進行切割。中大負責領導全球首個運用EndoMaster EASE系統進行內鏡手術機械人ESD嘅臨床研究計劃,喺今年5月喺香港成功完成第一宗個案。中大賽馬會微創醫療技術培訓中心主任趙偉仁教授表示,團隊至今已成功運用新技術為6名病人進行大腸ESD,並無穿孔個案。就算無操作內鏡經驗嘅新手,亦可以利用機械人內鏡平台完成ESD手術。

圖:中大醫學院