突如其來患上癌症,對成年人嚟講都會有一定嘅打擊,更何況係小朋友?台灣一位網紅媽媽「凱莉哥」,早前分享11歲女兒小露嘅患癌經歷,仲將呢段經歷剪輯成影片,希望鼓勵更多病人勇敢面對佢哋嘅病症。

喺今年1月,凱莉哥嘅丈夫發現女兒小露嘅頸部腫起咗,3月嘅時候進行詳細檢查,確診患上癌症。當時醫生同小露講,未來2年都唔可以返學,因為治療過程抵抗力好低,容易受到感染,小露聽到之後崩潰大哭,擔心自己無得同同學仔一齊畢業。

小露亦都感到好沮喪,每日都有好多針要打、好多藥要食,經常要住院,有時打針仲要全身麻醉,有時仲會有副作用,令佢昏昏沉沉,而佢父母表示會一直陪伴佢、唔使驚。佢嘅老師同同學亦都好好,老師會拍教學影片俾佢,而同學就會幫佢做筆記、寫信鼓勵佢,等佢知道自己無被遺忘。

凱莉哥勸勉小露,其實佢同其他人並無分別,只係有時需要治療,亦希望佢可以過正常生活,早睡早起、該學習就學習、該運動就運動。凱莉哥讚小露好勇敢,由一開始崩潰大哭到而家樂觀治療,小露希望鼓勵更多患病嘅小朋友,要勇敢面對自己嘅疾病,樂觀面對先至可以更有效幫助自己恢復健康。

影片連結:https://youtu.be/G2ZMw9StbiY

原圖:YouTube@村子裡的凱莉哥