正所謂「君子報仇十年未晚」,最近有位美國網民Rob Witts度過佢嘅42歲生日,佢收到佢爸爸寄俾佢嘅生日卡,一睇之下原來就係佢當年畫俾爸爸、挖苦爸爸42歲生日嗰張生日卡,Rob驚嘆「爸爸終於報到仇喇」。

Rob將呢張生日卡上載至Twitter,同網民分享。由照片所見,當年Rob喺送俾爸爸嘅生日卡封面上寫住「Hey各位,佢已經42歲了,不過…」,然後喺內頁寫上「我哋當然唔會在意啦,對嗎?爸爸42歲生日快樂!Rob留」。相隔28年後,Rob爸爸將呢張生日卡送返俾Rob,將卡內嘅「爸爸」同「Rob」對調,並加多句「我相信只要等得夠耐就會善有善報、惡有惡報」。

帖文獲唔少網民讚好,有網民大讚Rob爸爸好小心保管生日卡,直至有機會送返俾Rob。佢透露,佢最近打過電話返屋企,從媽媽口中得知,其實爸爸呢幾年無諗住復仇,只係咁啱喺閣樓發現呢張生日卡。Rob回應網民時表示,佢同好多人嘅觀察一樣,認為爸爸係一位好正嘅爸爸。

原圖:Twitter@robwitts