為咗預防新冠肺炎,唔少人出街戴口罩之餘,仲會買隨身空氣淨化機帶出街,但消委會測試發現,市面上嘅空氣淨化機除菌或去除空氣污染物嘅功效有限,喺將附近嘅污染物沉降或依附到物件表面嗰陣更加會造成二次污染。故此消委會強調,隨身負離子空氣淨化機唔能夠取代口罩等防疫裝備。

消委會測試咗市面上10款空氣淨化機,測試項目包括臭氧濃度、負離子濃度、除菌能力,同去除PM2.5能力。測試發現,全部樣本喺1.5立方米密封測試艙內嘅除菌率介乎64.9%至74.9%,而超過15分鐘之後、1個鐘頭內,樣本嘅除菌率都只係上升介乎2.8%至6.7%,表現令人失望。至於除PM2.5能力方面,有6個樣本表現遜色,30分鐘後嘅PM2.5去除率只係2%至4 .3%,其餘4個表現較好嘅樣本PM2.5去除率亦低於54%。

消委會提醒,即使喺細小密封空間入面測試,所有樣本都未能喺1個鐘內徹底去除細菌,如果用喺室外,更不足以保障用家免受細菌侵襲。消委會又指,隨身負離子空氣淨化機嘅淨化原理一般都係喺空氣中產生負離子,從而令附近嘅污染物沉降或依附到物件表面。但呢啲污染物容易隨空氣流動而重返空氣,出現二次污染。如果呢啲污染物本身附有細菌或病毒,當佢哋依附喺物件表面嗰陣,被用家觸摸之後再觸摸口、鼻或眼,就有機會受感染。

圖:消委會