新冠肺炎疫情,令唔少行業大受打擊!其中又以旅遊業影響最大,有專搞本地團嘅旅行社喺面對疫境嘅情況下,努力尋求轉型,希望可以喺疫境中生存落嚟!

「疫」市主動出擊 反應理想

其實喺45月嘅時候,香港疫情一度緩和,防疫措施逐步放寬,專搞本地團嘅活現香港,生意本來已經重上軌道,每星期舉辦嘅旅行團場場爆滿,可惜疫情喺7月又出現第三波爆發,限聚令收緊,對呢類實體嘅旅行團,影響最直接。與其坐而待斃,不如主動出擊,活現香港決定轉型,舉辦虛擬直播導賞團,而且反應非常理想,最近搞嘅「海濱同你講鬼故」,兩度推出都爆滿,睇嚟佢哋成功搵到一條出路。

成功虛擬團 絕不簡單

要舉辦一個成功嘅虛擬團,其實一啲都唔簡單,活現香港執行董事鄧彥心(Olivia)就表示:「虛擬團並唔係將導賞團放上網就算,而係可以交流嘅節目。」因此,虛擬團對導賞員要求亦相對提高,並唔可以只由導遊講述景點背後嘅故事,中途仲會加入現場投票環節,加強與觀眾之間的互動,喺景點同景點之間過場時,以往導賞員會俾參加者自己欣賞一下周圍景色,但虛擬團為免出現冷場,所以喺旅程某些路段,就會將畫面接駁到直播室,由公司同事同網上觀眾玩互動遊戲,又或者展示舊照片等。Olivia指:「點樣去編排行程係有啲困難,因為要配合現場導遊,中間停頓時間又唔可以太長,而且網上集中力唔強,每段時間要變一變,要有驚喜俾到團友。」

今次「海濱同你講鬼故」更加特別,喺景點同景點之間加插話劇演出,Olivia解釋:「喺籌辦虛擬團嘅時候,我哋希望個團要加突出,以往去澳門,有文創組織喺關閘搞導賞團,現場會有演員表演,一路講歷史一路演出。我哋一直想試下,但限制太多,今次終於可以實現呢個構思。」

作為導遊,Olivia亦指出帶虛擬團嘅困難之處:「導遊自然想每個客人都開心,我哋帶團時會睇客人眉頭眼額,有問題可以即場解決,但帶虛擬團就比較困難,好似同空氣講說話咁,所以做導遊要調整心態,要自我表演欲好強。」

另外,技術問題亦不能忽視,佢哋第一次舉辦擬團嘅時候,用手機試咗一次,並無問題,但臨舉辦前再試,發現聲畫都好差,原來手機數據已超過到上限,Olivia驚嘆:「原來無上限Plan並唔係真係無上限架!」好彩到虛擬團舉行前,佢哋終於物色到適合嘅手機同電訊商,並改用5G上網,總算解決咗技術嘅問題。

推廣到海外 接觸面更廣

凡事有弊亦有利,虛擬團亦唔例外。首先,因為佢哋呢類深度遊唔可以用「鴨仔式」嘅帶團方式,所以每次最多只能容納30名參加者。另外,好多香港景點,外國遊客未必可以咁容易睇得到,不過有咗虛擬導賞團之後,香港嘅景點接觸面將會更廣,任何國家嘅遊客未能拜訪香港時,都有可能成為虛擬導賞團嘅顧客。Olivia指:「呢類虛擬團可以Sell去國際,但本身要有故事,例如老店,放諸四海皆吸引,走嘅係小本經營,講求嘅唔係視覺豐富,而係人同人之間嘅交流。」

Olivia認為,虛擬團有存在價值,即使疫情之後需求減低,但如果識得互動娛樂,仍然可以繼續發展落去。

圖:活現香港

虛擬團對導賞員要求亦相對提高,並唔可以只由導遊講述景點背後嘅故事,中途仲會加入現場投票環節,加強與觀眾之間的互動。


今次「海濱同你講鬼故」更加特別,喺景點同景點之間加插話劇演出。