全球新冠肺炎疫情持續,好多人因此失業咗幾個月,本港好多演藝界工作人員亦如是。為此,香港現場演出及制作行業協會同大灣區共同家園青年公益基金,共同主辦咗一個全新網上直播音樂節目「#STAYTUNED+」,每集將邀請年青歌手、藝人同音樂素人擔任主角,鼓勵佢哋為夢想拼搏之餘,亦能夠為業內工作人員創造工作機會,喺疫情底下用音樂為大家打打氣。

 #STAYTUNED+」節目一共有16場,由10號起逢星期四晚上10點至11點喺香港現場演出及制作行業協會、大灣區共同家園青年公益基金嘅Facebook專頁同Youtube頻道同步直播。上星期四(10號)已經舉行咗第一場「#STAYTUNED+」,首集演出嘉賓包括演員敖嘉年、歌手歌莉雅,之後張彥博、劉浩龍、小肥、天堂鳥等藝人亦將會陸續出現喺節目入面。青年公益基金常務副主席霍啟剛喺社交平台寫到:「呢段時間大家都過得不容易,主辦方係希望藉音樂節目為演藝界青年工作者提供工作機會,亦透過音樂為市民大眾打打氣。」

圖:FB@霍啟剛 Kenneth Fok