如果身體有不適,就應該盡快去檢查,唔好諗住頂得順就唔求醫。喺江西,有一位23歲男子由6歲嘅時候,就出現手腳麻痺、嘔吐、頭暈等症狀,但一直都無求醫,直至近年症狀開始嚴重影響生活,先去醫院檢查,發現原來有寄生蟲喺腦入面足足17年咁耐,好彩可以做手術取出,否則就會危及性命。

綜合內地傳媒報道,呢位姓陳嘅男子喺6歲開始,就出現手腳麻痺、嘔吐、頭暈等症狀,但因為父母有肢體障礙,陳男以為症狀係遺傳引致,所以未有積極求醫,直至18歲症狀加劇,嚴重影響工作同生活,先至向醫院求診,檢查後確診患上「顱內曼氏裂頭蚴感染」,但因為蟲體位置唔適合做手術,所以只能採取保守治療。

直至今年8月25日,經再次檢查後,南昌大學第一附屬醫院醫生決定為佢進行手術。喺神經導航輔助下,進行咗4個鐘頭手術,成功喺大腦取出一條長約12厘米、寬約0.5厘米嘅曼氏裂頭蚴,取出之後呢條蟲仍然不斷蠕動,而陳男現時恢復良好,神經功能亦無受損。

醫院神經外科主任徐春華就話,曼氏裂頭蚴嘅蟲卵會喺水中孵出幼蟲,亦會寄生喺野生動物之中,當無辦法繼續成長,就會喺腦部、內臟、皮膚等部位遊走,消食人體組織,並引致病變,最嚴重可以致郃。但陳男表示,平時無生食蛙肉、蛇肉嘅習慣,但從由喺農村長大,經常喺水田玩耍。徐醫生懷疑,寄生蟲係經傷口進入陳男身體,再隨血液遊走到大腦。

原圖:中國江西網