新冠肺炎疫情爆發以來,政府多個部門都謹守崗位,齊心抗疫。除咗衞生署等喺前線作戰外,有唔少部門都喺後勤擔當重要嘅支援角色。發展局局長黃偉綸日前就喺網誌,介紹機電工程署喺抗疫方面嘅工作,包括協助改建普通病房作隔離病房、加裝體溫檢測系統,以及為救護車深層消毒。

黃偉綸喺網誌引述機電署署長彭耀雄嘅介紹,指機電署嘅工作主要係响工程方面提供技術支援同專業意見,包括喺醫院、診所、檢測中心、檢疫設施等提供服務,安裝並確保機電設施正常運作。佢舉例,機電署就聯同醫管局及業界,喺短時間內完成設計及組裝「流動組合式─高效能空氣微粒子過濾器」,協助將部分普通內科病房改建為具負壓功能嘅第二線隔離病房,加強醫院疫情嘅能力。

疫情期間,機電署亦迅速為多個政府場地,包括政府大樓、邊境口岸、康樂及文娛設施等,加裝體溫檢測系統,提升防疫測溫效率。

此外,負責保養及維修大部分政府車輛亦係機電署嘅工作之一,機電署區域經理(車輛)朱以剛表示,機電署因應消防處嘅要求同指引,為救護車冷氣系統進行深層消毒清潔,署方為同事提供相應訓練同指引,包括教前線人員穿著防護裝備。當有救護車接載過新冠病毒確診者,同事就會即時放低手頭上工作,抽調人手為救護車消毒。

原圖:發展局