香港中文大學醫學院盧煜明教授尋晚(10號)收到主辦方通知,榮獲有「科學界奧斯卡」之稱嘅「2021年科學突破獎–生命科學獎」,以表揚佢憑藉血漿DNA診斷技術,開創「無創產前診斷」方法,可及早為未出生嘅嬰兒診斷唐氏綜合症等多種遺傳病,為科學界、醫學界帶嚟革命性貢獻。

盧煜明喺1997年加入中大,同年發表孕婦嘅血漿內存有高濃度胎兒DNA。之後,盧煜明同佢嘅團隊更研發出唐氏綜合症嘅無創檢驗方法,透過大型平行測序技術同創新嘅生物信息科技,分析母體血漿中嘅微量DNA,從而破解出胎兒嘅全基因組圖譜,及早預測多種遺傳病。亦因此,盧煜明又有「無創產前檢測之父」之稱。呢個「無創產前診斷」方法宜家更被全球90幾個國家廣泛採用,每年有超過700萬名孕婦受惠。盧煜明獲獎後表示,今次呢個獎屬於成個團隊,仲話:「科研成果能夠在全世界廣泛應用,幫到無數家庭,令我非常鼓舞。」同時,佢希望未來有更多年輕人投身創新科技行列,一齊改變同影響世界。

圖:中大