唔知大家有無參加過馬拉松?跑完全程大概又用咗幾耐呢?日本跑手弓削田真理子喺58歲仲可以喺3個鐘內跑完全馬(Sub 3),61歲更創下60歲以上女子馬拉松世界紀錄,年齡增長完全無妨礙佢繼續跑步!

弓削田真理子細細個已經有運動天賦,大學嗰陣,佢因為見到馬拉松選手喺雨中嘅表現而備受感動,於是定下自己都要跑完全馬嘅目標。弓削田真理子啱啱出嚟社會做嘢嘅第二年,就參加咗第四屆東京國際女子馬拉松,當時嘅成績係3小時9分,已經係唔錯嘅成績,更令佢相信:Sub 3唔係夢。不過,自從弓削田真理子結婚生小朋友之後,生活重心就轉移到照顧仔女身上。而踏入40歲之後,弓削田真理子更成為在職媽媽,事業、家庭兩邊忙。但係,弓削田真理子一直無放棄過Sub 3呢個目標,加入一個以長者為主嘅跑會練跑,甚至工作(佢喺中學做體育老師)期間都爭取時間跑步。

卒之,就喺2017年大阪國際馬拉松上,58歲嘅弓削田真理子以2小時58分05秒嘅成績衝線,完成咗佢人生第一個Sub 3,嗰陣係佢參加嘅第80個馬拉松。3年之後,61歲嘅弓削田真理子,喺下關海響馬拉松跑出 2小時 59分15秒嘅佳績,成為史上首位Sub 3嘅60歲女性,打破埋世界紀錄,認真犀利!而喺新冠肺炎疫情肆虐期間,弓削田真理子都無偷懶,堅持練跑,佢仲話下個目標係65歲以上女子馬拉松世界紀錄喎。

圖:網上圖片