好多人都成日有個謬誤,就係做運動員一定係因為讀書唔叻,而Band 3嘅學生更加係唔讀書嘅,如果既係Band 3學生又係運動員嘅話就更加會被人標籤。有位網民就喺facebook群組「名校 Secrets」投稿指,自己係Band 3學生,亦係田徑運動員,曾代表香港出過3次境外比賽,但父母依然覺得佢係垃圾。網民更指因為自己係Band 3學生,成日被標籤、歧視。

網民指自己「破過學界紀錄,贏過海外比賽,有體路嘅人物專訪」,自問唔差得過好多Band 1、2學生,但就因為自己係Band 3而被標籤。網民試過搭車溫書期間被一個師奶指住,然後同個仔講:「讀吾到書就係讀依啲爛仔學校㗎啦」,當時網民真係委屈到喊出嚟。網民更指有啲Band 1、2學生以為Band 3學生唔使讀書,日日剩係返學校瞓覺打架。最慘嘅係,連屋企人都睇小網民,網民指自己訓練咁辛苦,都係想以運動員身份入大學,為未來鋪路,但屋企人就認為佢做運動員搵唔到食,令佢倍感迷茫。最後,網民希望大家唔好再用有色眼鏡睇Band 3學生。

其他網友紛紛留言鼓勵網民:「天生我材必有用,每個人都有佢自己嘅長處㗎,千祈唔好放棄」、「讀書唔叻唔代表一事無成」,同時亦有網友感歎係香港教育制度問題。

圖:LCSD