每個地方嘅飲食文化,唔多唔少都會有啲唔同,你當係草,人哋就可能當係寶!英國居民葛林(Martyn Green)早前同屋企人喺北威爾斯嘅海灘上,發現有大量外表奇怪嘅貝類生物依附喺一大條漂流木上面,有觸鬚由殼入面伸出。經查證後發現,原來每隻價值大約25英鎊(約250港元),粗略估計上面大約有2千隻,總值達5萬英鎊(約50萬港元)咁多!

葛林接受傳媒訪問時表示,起初係佢太太發現呢嚿有大量貝類生物依附住嘅木頭,然後就叫大家埋去睇下,佢形容呢啲貝類生物睇落好似唔屬於地球咁樣,於是佢就叫佢個仔Google下搵答案,發現原來呢種生物叫做「鵝頸藤壺」(Goosenecked Barnacles),一般出現喺潮間帶嘅岩石表面。

佢哋又發現,鵝頸藤壺喺西班牙同葡萄牙都被視為珍貴嘅食材,一隻就值大約25英鎊,而呢嚿木頭上就估計有2千隻。不過葛林就表示,唔希望透露發現鵝頸藤壺嘅具體地點,憂慮有投機者湧到當地破壞環境。

原圖:FB@Martyn Green