單親家庭往往喺照顧子女上比較吃力,不過父母為咗令子女健康快活咁成長,幾辛苦都會撐落去。一位叫李幫勇個雲南爸爸,因為右指殘廢被妻子拋夫棄女,為咗同時照顧囡囡同賺錢養家,李幫勇要帶住個女去送外賣,做足12個鐘毫無怨言,仲話個女比佢更攰。

39歲嘅李幫勇8年前去浙江嘉興一間工廠打工,喺嗰度識咗妻子並誕下囡囡。不過一次工傷令李幫勇右手手指致殘,佢被迫在家養傷待業,而妻子更喺個女6歲大就離家出走,之後再無辦法聯絡。李幫勇嘅媽媽早逝,妻子又走佬,唯有轉做外賣,獨自湊女。由於囡囡仲好細,唔方便獨留在家,李幫勇就將囡囡安置喺電單車嘅安全座上,每日帶住囡囡返工,夏天用布幫佢遮太陽,冬天就用被擋風。有時遇到無電梯嘅單,李幫勇仲會抱住囡囡上落送餐,貼身照顧,仲話:「我很累,我感覺女兒更累,她每天在電單車上坐十幾個小時。」

李幫勇父女嘅故事被傳媒報道後,好多有心人捐物資俾佢,醫院更免費安排李幫勇做手術醫好手指。當地一間幼稚園更主動免費提供學位俾李幫勇囡囡,等囡囡早啲入學,亦令李幫勇可以專心送外賣。

圖:網上圖片