喺亞馬遜雨林,仍然有一啲原住民部落喺入面生活,繼續守護佢哋嘅生活方式同傳統文化。不過巴西最近就發生咗一件不幸嘅事件,一位致力保護原住民保留區、服務超過30年嘅原住民專家,喺工作期間被原住民用弓箭射死。

56歲嘅弗朗西斯卡托(Rieli Franciscato),多年嚟喺巴西嘅原住民事務局工作,致力打造屬於原住民部落嘅保留區。週三(9日),弗朗西斯卡托喺巴西西部嘅朗多尼亞州(Rondonia)烏胡伊烏瓦瓦保護區(Uru Eu Wau Wau),發現咗一個部落,佢上前查看,結果被原住民用弓箭射中胸口。陪同弗朗西斯卡托嘅一名警察表示,弗朗西斯卡托中箭之後大叫一聲,拔箭之後走咗50米,就倒地失去生命跡象。

前原住民事務局負責人帕蘇耶羅(Sydney Possuelo)表示,弗朗西斯卡托個性沉穩,估計係因為有警察在場,先至引發攻擊。

原住民事務局官員迪亞斯(Ricardo Lopes Dias)就表示,弗朗西斯卡托將一生奉獻俾原住民,服務超過30年,為原住民留下巨大嘅遺產。

原圖:Twitter@amazonia_real