限聚令放寬,相信唔少人都想郊遊放鬆一下。位於大嶼山同青衣之間嘅馬灣,面積不足1平方公里,細小社區,但除咗大型私人屋苑之外仲可以到舊村走走,繞一圈全程大約1個鐘而且村又非常平坦,既有古蹟睇,又有無敵海景,仲可以近距離欣賞汲水門大橋,可以暫時將疫情拋諸腦後

 今次介紹嘅行程係咁嘅:

基慧小學巴士站→芳園書室→馬灣公眾碼頭→馬灣大街→天后廟→宣道會馬灣堂→馬灣公園古蹟館→基慧小學巴士站

芳園書室

首先,大家可以坐巴士,喺基慧小學落車,再沿住芳園路行,途中可以先參觀芳園書室。芳園書室建於1920年代,係馬灣唯一被保留嘅戰前小學,呢座兩層高嘅長方型建築,糅合中西建築風格。學校停辦之後,被活化成為芳園書室旅遊及教育中心暨馬灣水陸居民博物館。

馬灣舊村

跟住大家就可以向馬灣舊村進發,呢度嘅村屋大多兩至三層高,好有小鎮風味,其中馬灣大街以前係馬灣最大型嘅市集,不過為配合政府嘅發展政策,村民都搬到田寮新村同馬灣大街新村,舊村人去樓空,變成一個廢墟,影相真係好有Feel。呢度仲有一個馬灣公眾碼頭,喺度可以影到海豚像同汲水門大橋。

馬灣大街上仲有一座天后廟,保佑出海工作嘅村民平安,傳聞由張保仔於嘉慶年間所建。廟外有一大片平地,喺呢度可以近距離欣賞汲水門大橋。另外,呢度仲有棚屋同魚排,更有機會見到村民曬製蝦膏嘅情景添。

馬灣公園

沿住小路行,可以去到位於馬灣大街村北嘅宣道會馬灣堂,現時堂址建於1966年,建築也頗別緻。然後就進入馬灣公園範圍,公園面積唔細,係影相Hea遊嘅好地方,其中馬灣公園古蹟館仲有復修嘅清朝磚窰可以參觀,係馬灣嘅出土文物,好有價值。最後大家可以返到珀林路,坐巴士回去。


今次介紹嘅行程:基慧小學巴士站→芳園書室→馬灣公眾碼頭→馬灣大街→天后廟→宣道會馬灣堂→馬灣公園古蹟館→基慧小學巴士站


芳園書室建於1920年代,係馬灣唯一被保留嘅戰前小學。


馬灣大街以前係馬灣最大型嘅市集,不過為配合政府嘅發展政策,村民都搬到田寮新村同馬灣大街新村,舊村人去樓空。


喺馬灣公眾碼頭,可以影到海豚像同汲水門大橋。


呢座海豚像屹立海上,都幾特別架!

海豚像配大橋景,絕對係打卡靚位。

馬灣大街上仲有一座天后廟,傳聞由張保仔於嘉慶年間所建。


廟外有一大片平地,喺呢度可以近距離欣賞汲水門大橋。

唔只得大澳有棚屋,呢度都有,不過好多都無人住啦。


沿住小路行,可以去到位於馬灣大街村北嘅宣道會馬灣堂。

馬灣公園古蹟館內,有磚窰可以參觀。