近年網上出現唔少「假新聞」,講到似層層,令市民信以為真。教育局最近就推出教材,讓學校可以教導學生點樣查證網上資料。

教育局週三(9日)致函全港中小學校長,表示已經委託香港家庭福利會,為全港中小學師生同家長提供健康上網支援服務,又合作製作《「真假資訊要認清」小貼士》,教學生點樣分清真假資訊!

海報一共有8個小貼士,包括:

一、留意標題/內容。唔好輕信誇張嘅標題,閱讀全文有助了解事件。

二、查證來源。到相關網頁查閱資訊提供者背景,了解來源可唔可靠。而假冒嘅網站亦會將真實網站網址作少許改動,以誤導讀者。

三、查看日期/地點。留意有關訊息係咪舊聞重發,以及有關事件係咪喺提及嘅地點發生。

四、查看圖片。留意圖片有無被人篡改,以及係咪同訊息內容有關。

五、查看語言。如果訊息內出現好多拼寫同語法錯誤,有關資訊未必可靠。

六、核實訊息。睇下其他可靠來源有無類似報道,核對訊息內容嘅真確性。

七、笑話?廣告?個人觀點?如果內容太誇張,咁訊息可能係笑話或者諷刺,亦要評估有關訊息會唔會只係一啲個人觀點。另外亦要留意一啲模仿新聞報道嘅產品促銷廣告。

八、請教專家。如果有疑問,可以向專家請教或者到核實訊息網站查證。

原圖:教育局、RTHK