近年智能手機普及,差唔多大人細路都有一部,但香港有唔少學校都仍然禁止學生帶手機返學。喺日本,由2009年起就已經開始禁止中小學生帶手機返學,但近年越來越家長都呼籲政府放寬規定,日本當局最近終於容許中學生有條件下帶手機返學。

喺2018年,大阪北部發生強烈地震,因為學生無帶手機,導致父母無法同佢哋聯繫,於是就越來越多家長呼籲政府鬆綁,等佢哋可以喺發生災難時馬上確認子女安危。地震發生後無幾耐,大阪府教育委員會就允許大阪嘅中小學生喺父母同意之下帶手機返學,喺返學放學通勤時使用,而東京都教育委員會喺去年6月亦放寬讓學校根據情況自行調整。

負責教育嘅文部科學省大臣柴山昌彥亦認同「災難發生嘅時候,手機係非常重要嘅工具」,又喺內閣會議上主張放寬禁令。日本傳媒報道,文部科學省已經通知全國各縣市教育委員會,容許中學生喺一定規定下帶手機返學校,未來亦會由學生、監護人同學校三方共同討論、協議使用手機嘅規則,但小學嘅手機禁令將會維持。

日本傳媒又指出,2024年日本將喺小學全面引入電子教科書,相信「有條件帶手機返學」必然趨勢。

原圖:網易