喺疫情期間,大家只可以留喺香港,超級馬拉松運動員輝Sir黃浩輝,就決定利用呢段時間做一啲有意義嘅事情。最近佢聯同Run For Good,合作推出「環島‧走塑」活動,暫定喺924日舉行,到時輝Sir就會以直立板(Stand-Up Paddle Board)環繞港島一圏,為環保組織「綠惜地球」籌款!而呢塊直立板仲係由膠樽製成,絕對獨一無二!

陸上轉戰水上 挑戰自己

Sir表示早喺年頭嗰陣就有呢個諗法:「我覺得跑咗步咁耐,不如試下其他運動學下新技能,同時又做一啲同環保有關嘅project,學到嘢之餘又有意義!所以就諗到用啲回收膠樽砌一隻直立板。」雖然輝Sir平時都有玩開直立板,不過技術唔算好,亦唔係經常玩,但佢見到世界上好多運動員都嘗試突破極限,佢都希望可以用跑步以外方式挑戰自己!

為咗準備呢次挑戰,輝Sir花咗好多時間去掌握,強化體能,再訓練直立板技術:「始終水上活動唔算係強項,水對我嚟講算係較陌生嘅環境。」

Sir已經試咗幾次水,喺910日最後試水之後,佢表示:「今日個水流非常好,無風又無浪,扒得比較輕鬆,平時出名好難扒嘅位,好似石澳對出同鶴咀嗰段,假如風向同水流唔夾,會好難扒,但今次就無問題。」輝Sir仲話,上次試水嘅時候唔太習慣,扒得比較辛苦,之後多咗練習,熟習咗塊板感覺又好啲,所以佢覺得好滿意。

除咗技術之外,輝Sir話製作直立板亦係好大嘅挑戰,因為塊直立板係人手打造,所以溝通非常重要,佢就同 Ben Sir(項目另一要員,前滑浪風帆香港代表隊及港隊教練)要清晰表達佢哋嘅期望俾設計團隊,工程師亦要根據實際情況作出調整。「呢個項目令我有機會去接觸唔同層面嘅朋友,大家互相配合,解決困難,係一個好好嘅學習過程。」

原來呢塊獨一無二嘅環島直立板,係由新巴同城巴嘅工程師團隊及技工一齊製造,佢哋幫手回收膠樽膠桶,再將膠樽充氣同打磨,確保旅程能夠安全同順利咁完成!另外,工程師團隊亦仔細計算浮力,堅固度,平衡及流線型等因素,製作過程亦都善用環保物料,令項目可以貫徹「環島‧走塑」呢個主題。

珍惜資源 減少塑膠

呢塊直立板用膠樽製成,無非係想大家要明白珍惜資源嘅重要,今次活動嘅受助機構「綠惜地球」就係一間致力推廣珍惜資源、零浪費文化嘅團體,社區協作總監Vivien Cheng表示,佢哋一直好關心塑膠廢物問題:「香港每日棄置嘅垃圾中,有五分之一係塑膠廢物,大量塑膠廢料已進入海洋同食物鏈。」

在過去兩年,「綠惜地球」進行超過50場海岸清潔活動,見盡港灣、沙灘上無數垃圾,特別係「你化佢都未化」嘅塑膠製品。Vivien Cheng提醒大家:「現代人已無法同塑膠分手,但絕對要學習負責任地減少廢塑對生態環境和我們未來嘅傷害。」如果你想知多啲呢次活動詳情,就要留意「Run for Good」或「綠惜地球」嘅FB專頁啦!

圖:FB@ Run for Good、綠惜地球


輝Sir於9月10日作最後試水,剛好遇上好天氣,佢自己都好滿意!


為咗準備呢次挑戰,輝Sir花咗好多時間去掌握,強化體能,再訓練直立板技術。


輝Sir由陸上轉至水上,就係想用跑步以外嘅方式挑戰自己。


呢塊直立板仲係由膠樽製成,絕對獨一無二!


新巴同城巴嘅技工將膠樽充氣同打磨,確保旅程能夠安全同順利咁完成!


工程師團隊亦仔細計算浮力,堅固度,平衡及流線型等因素。


輝Sir話製作直立板亦係好大嘅挑戰,因為塊板係人手打造,所以溝通非常重要。


「綠惜地球」曾進行多次海岸清潔活動,發現沙灘上有好多塑膠品。