由於新冠肺炎疫情持續,口罩已經成為人人出門嘅必需品,但宜家市面上常見嘅外科口罩並無抗菌功能,病菌會喺口罩上存活多個小時,有機會造成第二次感染。有見及此,香港城市大學化學系助理教授葉汝全博士同團隊研發出嶄新技術,研發出抗菌嘅石墨烯口罩,呢種抗菌口罩亦有抗病毒嘅潛力,更加可以低成本快速製造。

石墨烯具抗菌性質,研究團隊早前更發現利用激光感生嘅石墨烯材料可以喺10分鐘後令兩種冠狀病毒失去活性。不過,傳統生產石墨烯嘅方法需要喺高溫環境下製作,合成時間長,成本又高,而葉汝全團隊研發嘅新技術就可以將大部分含碳嘅材料,例如纖維、紙張等轉化成石墨烯。新技術所用到嘅石墨烯製作系統,喺大部分機械產品店都買得到,仲能夠喺室溫環境操作。葉汝全話:「製作工序很簡單,製成品的價錢大約介乎外科口罩與N95口罩之間。」

葉汝全解釋,利用激光感生石墨烯材料能夠殺死幾乎全部大腸桿菌同空氣中嘅細菌,喺太陽光底下10分鐘,更可以殺滅99.998%細菌。而新技術可製成各類唔同形狀嘅多孔激光感生石墨烯,更可改變石墨烯孔口嘅大小,令人戴上口罩後依然能夠舒適咁呼吸。葉汝全更表示,佢哋嘅石墨烯口罩已有原型,通過認證測試之後好快就可以推出市場。

圖:城大