新冠肺炎疫情期間,學生要改以網上形式上堂,遇到有唔明嘅地方,未必能夠即時向老師提問。青協喺今年2月,因應疫情而推出網上問功課平台,為小學同初中學生提供免費即時嘅線上學習支援,至今已經服務過超過800位學生,並解答2350條唔同學科嘅問題。

青協喺2月建立「好義配‧好義補」平台,招募高中至大專學歷嘅義務導師,為小學同中一至中三學生解答各科疑難。青協督導主任鍾偉廉表示,學生同導師喺疫情之下,都可以用手機或電腦透過平台發問同解答疑難,現時已經有194名導師登記,過半都有學士或以上學歷,而服務獲得超過93%正面評價。

平台收到嘅求助最常見係數學科嘅問題,其次係中文、英文同科學科,青協會籍及義工組發展幹事區梓俊估計,學生可以上網搵到成語解釋同歷史等文科知識,但數學科就難以直接上網搜尋答案,而作答嘅時候亦要提供運算步驟,以致較多學生問數學問題。

原圖:FB@香港青年協會青年義工網絡 VNET