屋企人有病痛已經唔開心,仲要同時照顧患者同屋企人等多重壓力下真係會令人崩潰。有位媽媽網民就曾經歷過亡夫患癌症,自己同一時間要照顧丈夫同兩個囡囡嘅艱難時期。宜家媽媽網民嘅亡夫已經差唔多走咗一年,佢靠煮嘢食同囡囡一齊捱過嚟,好彩佢兩個囡囡都好乖,一家人亦慢慢走出傷痛。

呢位媽媽網民喺facebook群組「Day Day Explode 日日爆」投稿,憶述自己過去作為癌症病人照顧者嘅經歷。網民嘅亡夫之前患有癌症,佢哋一家係中產家庭,缺乏政府津貼,又無支援,要自己一條踢同時照顧丈夫同兩個囡囡。雖然網民嘅父母亦有幫手照顧其亡夫,但網民每日睇住丈夫嘅情況變差,另一邊又要笑住陪兩個年幼囡囡,承受嘅壓力好大。

網民嘅丈夫去世之後,兩個囡囡雖然如常返學,但失去爸爸嘅佢哋就有啲迷失、唔適應,細囡更加試過喺學校搵社工傾計。網民開始為囡囡整愛心飯盒,取代訂學校午餐,等囡囡知道,雖然佢哋無咗爸爸,但仲有媽媽陪住佢哋。宜家囡囡更愛上網民煮嘅嘢食,日日入廚房食飯都好期待,一家三口重新建立返一個新嘅生活。網民表示,自己親身經歷過之後,先明白長期病患嘅照顧者嘅難處,亦好佩服佢哋。但網民希望其他照顧者明白,雖然照顧患者嘅過程好痛苦同徬徨,但呢段時間可能係患者生命嘅最後階段,好需要照顧者嘅支持,所以,照顧者「最緊要搵位放鬆,佢哋並不孤單㗎。」

圖:FB@Day Day Explode日日爆