社會企業銀杏館早喺新冠肺炎疫情之前,已經不時有派「福飯」俾社會上有需要嘅人。而疫情期間,銀杏館透過「銀杏館愛心行動」繼續派飯,最近更推出咗「飯友配對送飯試驗計劃」,由活動能力較佳嘅「飯友」幫行動不便嘅「飯友」拎飯,然後代派上門。

銀杏館近日喺facebook專頁發文分享一個「飯友配對送飯試驗計劃」下嘅小故事,今年60歲嘅阿海因為十幾年前嘅一次意外,盤骨嚴重受傷,加上無親無故,要倚靠傷殘津貼過活。雖然經過多次手術治療,阿海已經康復9成,但求職路上依然處處碰壁,幾個月前嚟到銀杏館領取「福飯」以減輕生活開支。經社工鼓勵下,阿海上月中開始加入義工送飯行列,每日領取多一份「福飯」,親手送俾區內嘅陳婆婆。

75歲嘅陳婆婆獨居,身體非常瘦弱,一般人用七、八分鐘行完嘅路程,陳婆婆就起碼要花一個鐘以上。阿海話:「來取飯順道去送飯,只係舉手之勞,幫到人,係一件好開心嘅事。」就係咁,兩位素不相識嘅「飯友」,因為「福飯」而串連起來。文末最後更提到:「幫人,從來都不分富與貧,只要是幫到別人的難處,喜悅也便會隨之而來。」

圖:FB@銀杏館