喺新冠肺炎疫情期間,唔少景點同博物館都被迫關閉,而位於美國佛羅里達礁島群基韋斯特島(Key West)嘅海明威之家博物館(The Ernest Hemingway Home and Museum),係少數喺疫情期間依舊開放嘅博物館,原因原來係要照顧館內嘅一班貓。

海明威係20世紀最著名小說家之一,1954年憑住《老人與海》獲頒諾貝爾文學獎。佢亦係文壇知名嘅「貓奴」,佢養嘅第一隻貓「白雪」(Snow White),係一隻基因突變嘅六趾貓,喺海明威逝世之後,基韋斯特島上嘅故居就搖身一變成為博物館,而白雪嘅貓子貓孫亦繼續喺博物館內繼續生活落去。

海明威之家博物館內大約有40至50隻貓,全部都有六趾基因,有部分係白雪嘅後代,呢啲貓由館方照顧,有獸醫定期為佢哋做健康檢查,近年有唔少遊客嚟參觀,都唔只係為咗海明威,亦係為咗佢啲貓而嚟。

受到疫情影響,重挫當地旅遊業,導致博物館嘅收入大減,博物館原本有45名員工,但都因為要節省開支要解僱咗當中30人,以維持基本營運。館長莫拉夫斯基(Andrew Morawski)表示,博物館會繼續開放,確保館內嘅貓得到照顧。雖然疫情影響到當地旅遊業,但仍然有當地人前往參觀、玩貓,希望喺呢個時勢下得到一點慰藉。

原圖:FB@Hemingway Home Museum