喺新冠肺炎疫情下,醫院暫停探病安排,令病人同家人無法相見。有見及此,伊利沙伯醫院資訊科技部早喺疫情開始嘅時候,已經研發視像探病系統,由4月開始至今,九龍中醫院聯網已經有680名病人用過呢個視像探服務。

其中一位用過呢個服務嘅病人,係本身孕婦嘅愛明(化名),佢喺懷孕期間喺屋企跌倒昏迷,送院後發現佢腦血管撕裂導致出血性中風,喺多個部門合作下,為佢進行緊急剖腹分娩,又施行介入手術治療、植入腦血管支架,目前母子平安。

但因為愛明同初生嘅兒子處於兩個病房,無法相見,於是醫院就為佢使用視像探病系統,等佢哋可以相見、可以探望,一齊參與視像探病嘅,仲包括佢哋嘅家人,以及愛明入境無耐、需要檢疫嘅丈夫,經過一番努力,終於可以拼湊出一張「全家福」。

神經外科顧問護師文群蓮感謝同事嘅支持,又話可以診呢個機會,安排兩位專科醫生同病人家屬講解病情。兒科病房註冊護士馮寶芝就表示,BB出世2個幾禮拜,好努力生存下去,終於可以見到父母同屋企人、聽到佢哋把聲,場面感人。

神經外科顧問醫生潘德立認為,視像探病係一項令病人鼓舞嘅安排,令患者可以得到家人嘅鼓勵。

原圖:FB@伊院通 - Q E H 員工資訊台