受新冠肺炎疫情影響,今年開學好特別,老師同學生只可以隔住個mon相見。美國有位正在入院安胎嘅小學老師,為咗唔想令學生擔心,佢喺醫院期間都將病房佈置成班房,照常上網教書。

據外媒報道,喺美國加州蘭卡斯特一間小學任教嘅Janet Udomratsak,已經懷孕咗33周,但就有早產風險,所以需要入院安胎最少7星期。不過因為佢任教嘅小學喺上個月初就開學,Janet話「每個學年開始,是老師與學生建立關係的黃金機會,我不想錯過」,所以佢無請假,堅持繼續喺病房上堂。

為咗唔想令學生擔心,Janet將上堂嘅鏡頭巧妙咁避開病床同啲醫療儀器,仲將病房布置到好似班室咁,繼續教小朋友。Janet嘅先生擔心Janet會太辛苦,初時都唔讚成,不過Janet認為,教導學生可以給予佢力量,佢好開心可以繼續教學。有學生表示好鐘意Janet,覺得佢好有耐性,而家長亦好感謝佢可以繼續上堂。不過Janet嘅病房扮班房計劃始終百密一疏,被一個眼利嘅學生發現佢手上戴住醫院手帶,令呢件事被傳媒廣泛報道。

圖:FB@Janet Udomratsak