抗疫期間,唔少打工仔都選擇買外賣返公司食,方便嘅同時亦製造咗好多即棄餐具,加重對環境嘅負擔。有位環保網民為咗減少即棄餐具,自願幫同事準備愛心飯盒,環保之餘同事更食得健康、開心,一班網友睇完之後紛紛表示好想做佢嘅同事。

有位女網民喺facebook群組「Tai Po 大埔」分享多張唔同款式嘅飯盒相,表示呢啲都係佢過往一個月為同事準備嘅午餐飯盒。佢為咗減少同事買外賣而棄掉嘅一次性餐具,每日為同事準備愛心飯盒,由2個變4個,4個變8個,到宜家每日預備12至13個,仲要用架車仔推住啲飯盒返工。佢表示,當中雖然都有辛苦,但諗到每次可以減少咁多即棄餐具,就繼續支持佢去做呢件「傻事」,加上同事又食得開心,所以佢都無怨言,只係有時諗唔到要煮乜,又驚同事食唔飽。

網友紛紛留言:「做妳同事真幸福」、「多謝你支持環保」「我都想做你同事」。不過,呢位女網民表示,佢宜家呢間公司嘅老闆唔係太好,所以佢已經辭咗職。

圖:FB@Tai Po大埔