巨無霸(Big Mac)可以話係麥當勞嘅招牌漢堡包,早前麥當勞其中一個主要對手Burger King就喺澳洲推出一款同巨無霸外形相似嘅漢堡包,叫Big Jack。麥當勞方面認為Burger King涉嫌侵犯佢哋嘅商標版權,並已經入稟法庭控訴。

Burger King喺上世紀70年代初進軍澳洲嘅時候,發現店名已經被註冊,於是佢哋就以Hungry Jack's呢個名進軍澳洲。今年7月,Hungry Jack's就推出咗呢款名為Big Jack嘅雙層漢堡,結構同外形都同麥當勞嘅巨無霸非常相似。

麥當勞入稟法院,指控Hungry Jack's侵犯咗麥當勞嘅商標版權,故意採用或模仿巨無霸嘅外觀或結構、食材同標語,而兩款漢堡包同樣用咗芝麻麵包、2塊牛肉漢堡扒、特製醬汁、生菜、酸菜同洋蔥。據當地傳媒報道,麥當勞要求Hungry Jack's賠償損失,以及銷毀所有促銷用品。

原圖:Hungry Jack's、McDonald's Australia