「修女」一般俾人感覺都係好文靜,不過美國就有一位另類嘅修女,連續9年參加芝加哥馬拉松,最近仲考慮以參加2024年巴黎奧運馬拉松為目標添。

美國芝加哥一位修女Stephanie Baliga,佢喺2006年入讀伊利諾大學時,已經係一位越野跑好手,曾經喺全美大學越野跑錦標賽入面排63,當時同場有好多現職或退役嘅全職跑手參加,呢個成績一啲都唔失禮。後來因為一次傷患令佢重新思考跑步同人生嘅意義,2010年畢業之後,佢就投身Mission of Our Lady of the Angels成為一位修女。

Stephanie成為修女之後都未曾放棄跑步,由2011年開始,佢就為Mission OLA組織慈善長跑隊,每年參加芝加哥馬拉松籌款。但今年芝加哥馬拉松因為新冠肺炎疫情關係取消,佢就改用跑步機跑馬拉松,其他修女亦幫佢進行網上直播,最終以3小時33分跑完42.195公里,亦為Mission OLA籌得超過10萬美元(約78萬港元)。

歷年嚟,Mission OLA慈善長跑隊已經有近百名跑手,Stephanie表示,希望招募更多人參加,睇住新跑手努力訓練、完成初馬,形容係一個教人感恩嘅旅程。被問到將來有咩目標,Stephanie就話考慮緊爭取達標參加2024年巴黎奧運女子馬拉松,佢又話距離巴黎奧運仲有4年時間,邊個知道一定唔可能呢?

原圖:Twitter@OLAMission