為人父母嘅出去拼搏都係想俾仔女好啲嘅生活環境,但亦因為咁往往錯過咗好多仔女成長嘅重要時刻。北京有位叫宗澍坤嘅建築師,就選擇早早退休做全職爸爸,陪住一對仔女成長,仲一手打造一家四口嘅安樂窩,等仔女可以多啲親親大自然。

現年44歲嘅宗澍坤曾經係北京市建築設計研究院主任建築師,參與過鳥巢、水立方等知名建築嘅設計建造,一年有成7個月時間要出差。就喺佢過完40歲生日後,宗澍坤就辭咗職,提早退休做全職爸爸。佢喺2006年買咗北京郊區一幢4層別墅,自此不斷設計打造家居,而有咗小朋友之後,屋企更加成為一對仔女嘅遊樂場、幼稚園。宗澍坤話:「為人父母就這麼一次,我想陪孩子長大,事業之後再說 。」

宗澍坤嘅大仔已經到咗可以返幼稚園嘅年齡,不過佢就無諗住送囝囝去幼稚園,反而會同囝囝一齊整昆蟲標本,一齊照顧植物,多啲接觸大自然。佢認為幼稚園俾到小朋友嘅嘢,佢哋兩公婆都可以做到。宗澍坤有感中國社會唔少父母都對小朋友有更高期望,希望小朋友大個之後唔好同自己一樣,不過,佢就一啲都唔介意小朋友長大後同佢一樣,「因為他就是我的小孩」。

圖:一條