受新冠肺炎疫情影響,原定7月15至21號舉行嘅書展需要延期。貿發局副總裁周啟良今日(3號)宣布,書展將延期至12月16至22號舉行。而今年書展網站同流動應用程式仲新增全新嘅「網上書展」欄目,等書迷可以喺網上都買到參展商嘅書。

今年書展將沿用「心靈勵志」為年度主題,希望社會喺疫情下仍能「逆流而上」。大會更將喺書展網站、流動應用程式增設全新嘅「網上書展」欄目,目前已集合超過210個展商,提供超過11萬本書籍可供網上選購。除此之外,今年書展網站仲會增設「文化線上行」專頁,上載10幾年嚟包括金庸、倪匡、白先勇、幾米等作家或名人嘅講座片段俾大家睇。

周啟良透露,截止9月2號已經有約140家書商參展,而有政府第二輪防疫抗疫基金撥款贊助,同埋貿發局提供嘅優惠折扣下,大部分展商能夠免費參展。但係,書展能否如期舉辦,會根據新展期前一個月(即11月16號)嘅實際情況同風險評估後再決定,而書展開幕前一個禮拜將做最後評估,決定是否如期舉行。

圖:貿發局