受新冠肺炎疫情影響,市民留喺室內嘅時間增加,如果室內空氣質素唔好、通風差就好容易加劇病毒傳播。為咗監測室內空氣質素,理工大學研發咗一套「快速室內空氣質素及用電量監測系統」,可以用嚟監測環境質素,亦可以搵出污染物同病毒源頭,計劃將來可用喺餐廳、街市等人多嘅地方追蹤病毒散播途徑。

早前,理大屋宇設備工程學系研究團隊同校園可持續發展處合作,研發同試行緊一套「快速室內空氣質素及用電量監測系統」。呢個系統同時配備「空氣病源追蹤模式」同「室內換氣率計算」功能,可釋放示蹤氣體,模擬空氣中污染物嘅病毒散播途徑,從而估計污染物或病毒源頭,同計算室內換氣率。

理大表示,今年年初已經喺校園內設咗約30個測試點,每個測試點嘅測試範圍為500呎。系統亦已獲得政府醫療衛生研究基金資助150萬元,將喺10月起用作監測、追蹤公共屋邨排水通風管釋放嘅氣溶膠分布。理大屋宇設備工程學系副系主任及副教授梅國威表示,系統已準備好投入市場,亦可於新型冠狀病毒疫情發揮作用,為室內地方如街市、餐廳等分析病毒傳播風險,安排防控工作。

圖:理工大學