唔少人都會有「拖延症」,明明知道自己有啲嘢需要做,但往往都會拖到最後先做,甚至做唔切,呢種心態都會對我哋學業、工作,甚至生活造成影響。有研究發現,原來拖延呢種習慣,係同缺乏自信有關,甚至有機會導致憂鬱,真係唔可以忽視!劍橋大學的心理健康研究專員Olivia Remes就分享咗幾個經科學證實嘅方法,幫大家克服「拖延症」,今日就同大家睇下!

一、面對最初期嘅不適感

好多時我哋開始工作嘅時候,都會覺得無聊或者有恐懼,於是就會下意識想擺脫呢啲工作。雖然咁做會令我哋嘅即時感覺良好,但就會造成長遠影響。所以一旦出現不適感,就要迅速調整心情,不妨同呢種不適感共處一陣,搵出呢啲負面情緒嘅來源,繼續執行你嘅工作。你會好快意識到,原來呢種不適感只係暫時性,會隨時間而消散,日子耐咗你就可以鍛鍊到你嘅自制力,培養你嘅積極性。

二、選擇當下你想關注嘅情緒

另一個方法就係去選擇自己想關注嘅情緒,去做一件事嘅時候可能會感到煩躁或者充滿壓力,因此而唔想去開始做,但其實我哋都會有其他較正面嘅情緒,例如渴望學習新事物、渴望工作熟練得到晉升機會等等。呢啲渴望都可以令我哋更容易投入工作,亦令工作變得更有意義。

三、唔好猶豫、直接去做

有時啲人有「拖延症」,唔願去開始做一件事嘅時候,係因為希望可以完美地完成佢,或者因為覺得未準備好而無法開始。但直接開始去做嘅話,就可以令工作更容易完成,而且之後隨時可以完善呢個工作,只要貫徹呢個做法,就會逐漸將呢種厭惡感,變得興奮同自在。

四、動力伴隨行動而來

唔少人都以為,當前嘅感受就會成為將來嘅感受,例如今日覺得開心所以推遲做某件事,覺得聽日都一樣係咁開心,所以留返聽日先做。但其實呢個諗法係錯嘅,事實上我哋無法預測或預知我哋之後嘅情況係點,只要了解到呢一點,我哋就會更容易去開始一項工作。同時,我哋開始做一件事,亦會開始累積動力。好多人以為要等到感覺良好,或者充滿動力先至開始做,但其實動力係隨住開始行動而嚟嘅。

五、停止發白日夢

想減輕「拖延症」,就應該減少發白夢同放空嘅時間。我哋大部分時間喺度諗緊一啲無關重要嘅事,或者漫無目的咁瀏覽社交網站。有研究指出,放空有可能會擾亂工作表現、影響閱讀理解力,亦將我哋嘅注意力由工作轉移到其他地方,更難回到工作上。放空甚至會令人上癮,導致自制力減弱,甚至造成憂鬱。因為發白日夢就會將注意力轉到自己身上,以及一啲自己未能實現嘅目標,導致胡思亂想。所以解決方法就係要關注當下,完成手頭上嘅工作。

原圖:百度