一到農曆七月,總覺得陰風陣陣,周身都唔聚財!不過,竟然有人仲夠膽帶團去「搵鬼」,究竟佢哋搞乜「鬼」!原來呢個係海濱事務委員會同活現香港合作搞嘅本地團,以推廣西環海濱一帶,咁啱臨近盂蘭節,所以佢哋決定以「鬼故」做主題,實行同大家尋「幽」探秘。

虛擬旅行團 反應理想

由於疫情關係,今次呢個團只可以虛擬形式進行,雖然唔可以親歷其境,但早前曾經舉行過一次,反應極佳,好快就滿額啦,所以決定喺9月12日再辦一團。

香港各處都有鬼故,不過西環堅尼地城一帶,大概舊樓眾多,附近又有唔少殮房墳場,所以絕對係「搵鬼團」嘅理想地點。今次呢個「海濱同你講鬼故」旅行團,就會由觀龍樓對出嘅科士街空地出發,途中會經過科士街石牆樹、西環邨、加多近街、聖路加堂旁山坡、東華逗局紀念公園,最後以西環海旁作終點。

活現香港執行董事鄧彥心(Olivia),亦係呢次虛擬團嘅導遊,佢認為香港呢種信抑文化好值得介紹俾外國遊客:「外國人會覺得好Fascinated!因為喺華人世界,人鬼天界係會有交流,鬼魂會間中上嚟探親,亦容許大家有一啲想像空間,所以就有《聊齋》呢類故事啦。」

搵鬼兼學歷史

雖然話係「講鬼故」團,其實行程除咗「搵鬼」之外,仲會帶大家認識呢一帶嘅歷史建築,令大家對呢度有多一啲認識。因為西環堅尼地城一帶,係香港最早發展嘅地區之一,加上曾爆發多次疫症,都令呢一帶更添傳奇色彩。

其中加多近街及卑路乍街交界處,昔日係一處叫一別亭嘅地方。原來最早期嘅公葬地位於雞籠灣,即現時華富邨附近,面積大而路途遙遠,親友送喪辭靈通常會喺西環堅尼地城舉行,東華就喺1918年修建辭靈亭,命名為「一別亭」,送葬親友可租用燒香行禮,然後再送上山。直到1958年,一別亭先至改作其他用途。

而喺堅尼地城巴士站旁,有個小小嘅東華痘局紀念公園。昔日香港曾爆發多次疫症,落成於1910年嘅東華痘局,主要以中醫藥治理天花病人同接種牛痘,隨住天花絕跡,東華痘局於1938年交還政府用作傳染病醫院,拱門及奠基石就移放到西寧街以作紀念。

至於聖路加堂旁嘅山坡,雖然唔多起眼,但其實都好有歷史價值,話說幾年前一對建築發燒友發現呢一帶嘅山坡,石級上刻有人名及籍貫,部份有號碼,數目達20多塊,懷疑石塊係墓碑。原來呢度附近昔日係堅尼地城鼠疫墳場,1953年,政府將墳場搬走,留下嘅墓碑就被人用來搭建梯級及護土牆。Olivia都話對呢個地方好難忘:「行上去嘅時候真係有啲驚,有齊陰森恐怖嘅氣氛,感覺真係唔多舒服。」

行程最後一站係西環海濱,放心,今次無鬼啦,Olivia亦話好鍾意呢度:「呢度同海好近,環境好好,係西區影日落最正嘅地方。所以近年好多年輕人來打卡。嚟到呢度,不只係視覺嘅享受,係令生活多咗一種閒適。」

假如你都對呢一帶有多啲認識,活現香港會喺912日 5:00-6:30pm再次舉辦虛擬團「海濱同你講鬼故」,免費參加,有趣興嘅朋友,請留意Walk In Hong KongFacebookInstagram,亦可以上佢哋嘅網站 https://walkin.hk/public-tour/harbourfront-virtual/

圖:LOOOP.HK、活現香港


Olivia認為,香港呢種信抑文化好值得介紹俾外國遊客,因為外國人會覺得好Fascinated!


今次呢個「海濱同你講鬼故」旅行團,會由觀龍樓對出嘅科士街空地出發,途中經過科士街石牆樹、西環邨、加多近街、聖路加堂旁山坡、東華逗局紀念公園,最後以西環海旁作終點。


位於西環科士街球場側嘅石牆,已有約百年歷史,牆上長有一列多棵高大嘅細葉榕樹,甚為壯觀。Olivia表示:「中國傳統覺得榕樹會招魂,所以有唔少人祭祀榕樹,例如香港仔就有一間榕樹公公廟。」


西環邨係香港最古老嘅公屋之一,依山一級一級而建,大部分單位都有海景,近年成為打卡熱點。


加多近街及卑路乍街交界處,昔日係一處叫一別亭嘅地方。


「一別亭」建於1918年,送葬親友會喺度燒香行禮,然後先送上山。

落成於1910年嘅東華痘局,主要以中醫藥治理天花病人以及接種牛痘,隨住天花絕跡,東華痘局於1938年交還政府用作傳染病醫院,拱門及奠基石就移放到西寧街以作紀念。


域多利道聖路加堂旁,有座小小嘅山坡。

石級上刻有人名及籍貫,部份有號碼,原來竟然係墓碑。


行程最後一站係西環海旁,係西區影日落最正嘅地方。