酒飲得多對身體無益,對小朋友嚟講,佢哋腦部仲處於發育階段,對佢哋身體嘅傷害更大!喺內地,就有一位公公每日俾8歲嘅孫仔飲啤酒,後來媽媽發現個仔眼睛同皮膚都發黃,送院之後醫生話佢幾乎肝衰竭,好彩及時察覺,作出針對性治療之後,情況慢慢好轉。

內地傳媒報道,一名大約8歲男童晨晨(化名),父母喺浙江紹興工作,於是晨晨就交由住喺重慶老家嘅公公婆婆照顧,直至今年暑假,父母將晨晨接到紹興過暑假,媽媽察覺到晨晨嘅眼睛同皮膚發黃,於是就帶佢去當地醫院檢查,發現佢嘅肝酵素指標超出上限30幾倍,醫生於是以重症肝炎,安排佢入院進一步檢查。醫生詢問病史嘅時候得悉,晨晨入院前曾經食完魷魚之後嘔吐,當時醫生一度懷疑佢患上戊型肝炎,將仍轉至杭州市兒童醫院接受治療。

杭州市兒童醫院祁正紅醫生表示,剛轉嚟嘅時候,晨晨嘅黃疸有逐漸加重跡象,另外亦有腹痛、小便發黃、凝血指標異常等情況,肝功能越來越差,幾乎步入肝衰竭。當時醫院希望搵出係咩毒物或者藥物引起肝損傷,向晨晨父母問過幾次但都無發現。

後來打電話俾公公,終於解開謎團,原來公公照顧晨晨嘅時候,每晚都會飲啲啤酒,而晨晨就係咁扭計話要飲,當時公公同婆婆都拒絕,但連續幾日之後,拗唔掂晨晨,就俾晨晨試下,晨晨覺得好好飲,亦無咩反應,於是公公婆婆自此就每日都俾佢同公公飲一杯,大約100毫升。醫生知道係酒精性肝損傷之後,作出針對性治療,情況慢慢好轉。祁正紅醫生表示,佢從醫20年嚟,係首次接觸有小朋友因為飲酒而導致肝損傷。

祁正紅醫生勸大家唔好俾小朋友飲酒,佢指出小朋友嘅肝臟化謝能力弱,短時間內攝入少量就可能引起嚴重嘅肝損傷,此外仲可能會造成腦損傷等,所以一定要保護兒童、遠離酒精。

原圖:網易