新冠肺炎疫情喺全球多國持續,政府採取嚴厲嘅入境措施,防止疫情傳入,但措施同樣打擊當地旅遊業。喺巴西嘅費爾南多迪諾羅尼亞群島(Fernando de Noronha),由9月起重開,但就只容許曾經染疫並已經好返嘅遊客進入。

費爾南多迪諾羅尼亞群島位於巴西東北海岸約354公里,由3月起實施封鎖措施,喺4月同6月更禁止喺島外嘅居民重返該島,當地至今錄得93宗確診病例。

群島所屬嘅伯南布哥州衛生部長羅沙(Guilherme Rocha)表示,群島已經長時間無出現社區傳播情況,下一步將會著眼於安全以及重啟經濟活動。

群島重新對外開放,但就規定只有曾經染疫並已經好返嘅遊客先至可以進入,官員隆哥(André Longo)表示,遊客需要出示20天前嘅抗原聚合酶連鎖反應(PCR)陽性結果,或血清學檢測結果,證明自己擁有新冠肺炎抗體。

但喺本港以及比利時同荷蘭等地,都相繼出現新冠肺炎患者二次感染嘅案例,令外界對康復患者嘅抗體水平同持續時間有懷疑。

原圖:Twitter@CostaDelPlay