每個人嘅長處唔同,唔一定個個都有天分讀到書,所以如果以讀書叻唔叻嚟衡量一個人就太片面。有個應屆DSE考生網民發文指自己DSE有17分,父母同自己都好開心,但就被啲親戚嘲諷、無視,網民覺得好自卑,好彩佢父母無咁睇佢,媽媽更安慰佢讀書唔叻唔緊要,最緊要對得住天地良心、爸爸媽媽就夠。

呢位網民喺facebook專頁「名校Secrets」投稿話,自己由細到大屋企人因為工作繁忙完全冇監督過佢讀書, 加上佢本身係一個自覺性低嘅人,上咗中學之後「冇嗜好冇興趣冇目標,讀書都係好Hea」。所以DSE放榜出嚟嘅成績有17分,網民同屋企人已經覺得喜出望外,好開心。雖然都係入唔到大學,但起碼唔使讀基礎文憑,可直接讀高級文憑。

不過呢種開心情緒就被幾日前嘅親戚聚會打破曬,網民話佢啲親戚全部都係好有錢、好勢利嘅人,知道佢DSE成績後雖然班親戚無擺明揶揄網民,但就係咁講同網民同屆嘅女有幾多粒星星。網民知道自己有幾多斤両,都無話羨慕、妒忌之類,加上佢爸爸媽媽從來唔會將佢同人哋比較,所以都無將親戚嘅說話放喺心上。但係聚會當晚,親戚就將網民一家當透明,臨走之前仲同網民媽媽講:「一早叫你每個月dum幾千蚊比佢(斜眼望我一下)補下習就唔使咁啦!」仲指住網民叫佢努力啲,當下網民呆咗,但令佢最心痛嘅係媽媽答佢:「係囉 ...最衰我地搵得少,俾唔到最好嘅學習環境佢...」

網民因為呢件事唔開心咗幾日,覺得好自卑,一方面覺得自己嘅成績差令阿爸阿媽好無面,另一方面又為啲上流親戚唾棄佢哋一家低學歷而感到無奈。媽媽知道後,主動安慰網民話:「你已經好叻,入唔入到大學,我哋真係唔介意,你已經叻過爸爸媽媽(佢哋都係中五學歷)就算你以後做D咩,做得叻唔叻只要對得住天地良心、爸爸媽媽。」呢個post一出,網友大讚網民媽媽明白事理、EQ高,仲叫網民應該感恩、珍惜咁好嘅父母,亦有網友留言:「你親戚衰人品,再叻都冇用」、「努力就有出頭天」、「狗眼看人低的親戚,有幾重要? 有愛自己嘅父母先係天下無敵」、「做好自己,行好自己條路就得。」

圖:網上圖片