當繪本作家,相信係唔少年輕人嘅夢想,不過,要做創作人,從來不是一件容易嘅事。著名繪本作家高佩聰接受圈傳媒訪問時就強調:「繪本有否感情,小朋友係感受到嘅!所以創作時,要賦予情感到書中。」

發現小朋友另一面

SOWGOOD!正向品格教育館與榮獲第一屆「香港圖畫書創作獎」首獎及第五屆「豐子愷兒童圖畫書獎」佳作獎得主高佩聰女士合作,推出繪本作品《生日快樂》,透過繪本培養小朋友嘅正向品格。高佩聰表示:「《生日快樂》籌備足足一年,過程並非一拍即合,而是互相認識,慢慢發現共同理念,先會有火花。」佢又表示:「起初擔心會有好多限制,因為好嘅繪本,唔應該以教育嘅目嘅去創作,好彩接觸之後,發現自由度好大。」

 未做到,唔放棄

高強調,同小朋友接觸,可以令佢透小朋友嘅目光去睇世界。原來喺繪畫作品之前,正向品格教育館邀請高女士帶子女嚟參觀,活動期間,佢發現兒子經常被忽略嘅能力:「哥哥一向性格獨立,但嚟到SOWGOOD!,我發現原來佢有團結朋友嘅能力,令我很震撼,亦影響咗自己呢次嘅創作。」

至於妹妹,個性活潑開朗,喺活動之後,更不斷重覆活動時學過嘅口號「未做到,唔放棄」,令高忽發奇想,開始回想自己有什麼放棄咗而無做嘅事情:「我搵番一個由學生時期開始創作,但後來放棄咗嘅故事,藉此機會重做,以往自己經驗唔夠,處理唔到,經過十多年後,自己經歷多咗,以前覺得困難嘅地方,現在終於可以處理到。」透過創作,佢搵番自己嘅勇氣和堅毅。

將灣仔情懷放進故事

呢次作品《生日快樂》,圍繞灣仔街道上嘅人與事物,令故事更添濃厚嘅本土社區情懷。高表示:「美好事情都喺自己身邊,我發現除咗屋企之外,灣仔亦係自己最熟悉嘅地方。因為自己差不多係喺灣仔成長,小學、中學、第一集寵物同第一次上班嘅地點,都係喺灣仔,發現雖然經歷咁長時間,有啲街道、大廈唔同咗,但當中嘅感覺或回憶其實係不變嘅,我希望將呢種不受時間影響嘅感情,放入故事中,所以將灣仔這個場景作為新作嘅背景。」

高又表示:「我自己好喜歡行路,加上住嘅地方近住鵝頸橋,每次嚟灣仔,自己都會一個人慢慢行,感受到人氣,令我感到自己一個人也不覺寂寞。」

高佩聰相信,好嘅繪本,裡面都會有一種情感,這種情感往往係創作者本身嘅感受。夢想做創作嘅你,如果對身邊事物都有深刻嘅感受,咁就唔好諗咁多,即刻提起筆記錄低啦!

圖:SOWGOOD


《生日快樂》係SOWGOOD!正向品格教育館推出嘅首本繪本作品。