通常化妝叻嘅人隻手都好靈活,不過泰國有個教人化妝嘅網紅Buntida Chinnawong天生就無手臂,但佢就憑住自己對化妝嘅熱愛,鍛煉用腳嚟化妝,搵到佢嘅自信同夢想。佢靠對腳嚟教人化妝,其高難度動作嘅直播吸引唔少人追睇,宜家Buntida Chinnawong嘅IG有超過20萬粉絲添。

20歲嘅Buntida Chinnawong一出世就患有先天性殘疾,膊頭、小腿、臀部都有先天性彎曲,亦因為咁佢經常被同學欺負。而佢同好多貪靚嘅女仔一樣,中學時期就愛上咗化妝,於是Buntida就下定決心要靠自己嘅力量嚟化妝。佢每日小心翼翼咁練習,學識用腳夾起腮紅刷、眼線筆,慢慢咁佢同好多經驗豐富嘅化妝師一樣,可以畫出精緻嘅妝容,唔講真係唔知佢用腳都可以化到咁靚嘅妝。

Buntida直播嗰陣,會用雙腳同粉絲打招呼,然後用腳指頭夾起化妝刷熟練塗抹塊面,有時甚至仲會用腳拎起雙眼皮貼,精準咁貼落眼皮上,高難度動作令佢每次直播都吸引幾十萬粉絲收睇。Buntida希望能夠用化妝教學影片,幫助嗰啲同佢一樣嘅人,佢認為外表唔係最重要,重要嘅係自己嘅內在同才華。

圖:FB@Buntida Chinnawong