一講到七月十四,大家自然會聯想到鬼鬼怪怪,晚上走在街頭更覺陰風陣陣……其實中國盂蘭傳統源遠流長,亦唔係真係咁恐怖!今日就唔再嚇大家,一於同大家講吓盂蘭文化傳統啦。

中國傳統佛教相結合

據珠海學院香港歷史文化研究中心主任蕭國健表示,中國傳統有中元節,民間按例要祭祖,向祖先報告秋成,漸漸就變成祭鬼嘅活動。到咗漢末,佛教傳入,佛教有盂蘭盆法會,話說目連得道之後,用天眼通見到母親喺地府生活悽慘,於是用法力將飯菜送俾母親,但飯菜一送到母親口邊就化為火焰,佛祖指其母在世時種下罪孽,要集合眾人力量先可化解,於是目連同一眾高僧舉行大型儀式,超渡亡魂,流傳至後世,大家會焚香燒衣,拜祭由地府出來嘅餓鬼。於是中國傳統同佛教結合,就成為今日嘅盂蘭節。「所以祭祀活動有時係和尚有時係道士,好難講邊個正統正確,各有各做,大家都係求心安,得到慰藉而已。」

蕭國健又指,大約宋元期間,逃難者嚟到香港,連帶將盂蘭傳統帶到嚟香港。而且中國曾經歷「除四舊」,所以依家內地盂蘭傳統反而無香港咁濃厚:「依家去舊區,例如西營盤,仲會見到好有特色嘅街邊燒衣,會準備芽菜、豆腐、龍眼,拜完就撒落地下,又會用紙紮成一圈當係布,燒俾鬼魂,亦會準備一啲散銀,撒落地下。」

潮州盂蘭勝會 歷史悠久

香港不但保存濃厚嘅盂蘭傳統,而且香港人來自五湖四海,各式各樣盂蘭傳統都喺香港見得到,較常見有四個族群︰即水上、本地、海陸豐同潮州。

其中潮州盂蘭活動喺香港非常普遍,根據香港潮汕文化協進會表示,現存最早記錄係銅鑼灣嘅潮州公和堂盂蘭勝會,已有一百二十幾年歷史。戰前以銅鑼灣糖廠、三角碼頭、九龍倉(海防道及官涌)嘅盂蘭活動最出名。時至今日,除咗大埔、屯門同離島之外,全港有15區都會舉行潮人盂蘭勝會。

盂蘭節對潮州人意義重大,喺潮汕地區,一般稱為施孤(施捨給孤魂野鬼)、七月半,主要係喺農曆七月十五呢一日喺街上燒衣,並沒有共同籌辦嘅勝會,反而嚟到香港之後,移居香港嘅潮人舉行盛大嘅盂蘭勝會,將傳統發揚光大。

香港嘅潮州盂蘭節傳統活動,會舉行一天至五天不等。活動包括︰請神巡遊、安爐、豎幡、誦經、祭好兄弟、附薦、放燄口、化大士爺、派米派福品、福品競投、謝佛送神,還有潮劇表演等等。當中使用的潮式祭品(包括糖塔及潮式糕餅、紙品、福品、派米派福品)同埋藍面嘅大士王,都同其他地方唔同。

其中神功戲嘅演變亦值得留意,「早期潮人盂蘭勝會都會以潮州八音為主,比較簡單,之後逐漸改為皮影戲或潮州鐵枝木偶,到後期改以潮劇為主,都可以睇到潮人喺社會地位嘅提升。」

積極推廣 傳承文化

可惜,受到疫情影響,今年大部分盂蘭勝會暫停一年,當中銅鑼灣公和堂盂蘭勝會、東頭邨盂蘭勝會,會喺會址舉行簡單拜祭及燒衣紙秀茂坪潮僑街坊盂蘭會改到附近的招利聖君古廟舉行佛教三角碼頭街坊盂蘭勝會,就會喺干諾道西設天地父母棚供街坊上香。另外,亦有部分位於私人場地嘅活動照常舉行,例如黃竹坑大王爺廟九龍仔信禫德堂,仍有誦經、附薦、祭品、燒衣等,但因限聚令緣故,或會有微調,大家要留意

除咗疫情影響,潮州盂蘭勝會亦面對人口老化、青黃不接嘅問題。香港潮汕文化協進會就表示:「我哋一直努力推廣潮州話,以往會喺盂蘭盛會舉辦『潮人學堂』,教潮語、潮州工夫茶攤位等等,希望可以傳承潮人文化。」可惜呢啲活動今年都要暫停,希望下年一切回復正常,大家可以再次參加,感受中國傳統節慶文化。

圖片來源:香港潮汕文化協進會


今年嘅東頭村取消盂蘭勝會,只會址內簡單拜祭,祈求平安,簡單佈罝,備基本祭品及紙扎。

今年嘅佛教三角碼頭街坊盂蘭勝會亦已取消,但整個農曆七月會喺干諾道西設天地父母棚,方便街坊上香。


今年嘅深井潮僑街坊盂蘭勝會取消巡村請神、潮州鐵枝木偶、盆菜宴、福品競投,只保留盂蘭拜祭。


今年嘅旺角潮僑盂蘭勝會喺詩歌舞街遊樂場旁邊舉行小型拜祭。

2017 深井潮僑街坊盂蘭勝會:近年加入舞龍醒獅等新元素,吸引居內年輕人參與請神巡遊,為活動增添活力。


2019 東頭村盂蘭勝會:盂蘭勝會首天早上,請神巡遊隊伍會到該區廟宇請神。雖說請神,其實是從廟宇香爐中取部份香爐灰到盂蘭場地,供善信參拜。

潮州公和堂盂蘭勝會已有一百二十多年歷史的潮州公和堂盂蘭勝會,可惜受到場地要興建新建築物,2019年起停止公演潮劇,難免令活動失色。


2019 紅磡三約潮僑街坊盂蘭勝會:糖塔及潮式禮餅係潮人盂蘭勝會一大特色,拜祭完畢可供食用。潮州糖餅及糖塔製作技藝已被列入香港非遺清單。

2019 東頭村盂蘭勝會:睇見藍面及雙腳直立嘅大士王,就知道係潮州人舉辦嘅盂蘭勝會。


2019 牛頭角區潮僑街坊盂蘭勝會:神桌前嘅福品在盂蘭勝會最後一晚供街坊出價競投,為來年盂蘭勝會籌務經費。

2016 李鄭屋及麗閣邨潮州工商盂蘭勝會:潮劇吉祥戲《十仙慶壽》,觀眾加點想像力,就可以估到十位演員正排成一個「壽」字。


2018 深井潮僑街坊盂蘭勝會:香港玉梨春潮劇團演出的潮州鐵枝木偶潮劇,係香港碩果僅存嘅鐵枝木偶表演藝術。

2019 筲箕灣南安坊坊眾盂蘭勝會:加入潮州布馬舞演出,為活動增加潮汕文化氣色。

2019 粉嶺潮僑盂蘭勝會:香港潮汕文化協進會在盂蘭場地教講潮州話,為盂蘭勝會增添新元素。


2019 錦田八鄉大江埔潮僑盂蘭勝會:香港潮汕文化協進會會長帶領義工在盂蘭場地沖泡潮州工夫茶,為盂蘭勝會增添新元素。