為咗搵出新冠肺炎確診者同其密切接觸者,香港浸會大學科研團隊研發出一個新冠病毒風險警示系統,使用者如果曾經身處確診者到訪過嘅同一地點,且兩者到訪相隔嘅時差有造成感染風險嘅範圍,系統就會透過手機應用程式發出警示。浸大計劃將會喺新學期喺校園試行新冠病毒風險警示系統,所有師生同員工都可以自願參加。

呢個警示系統由浸大計算機科學系副系主任及教授徐建良教授領導嘅團隊研發,分兩種匿名運作模式,一種係「場地對人」嘅警示模式,另一種係「人對人」嘅警示模式。第一種模式下,用戶只需下載手機應用程式,喺進入某個場地之前,用手機掃描場地嘅二維碼,有關場地同到訪時間嘅資料就會保存喺佢哋自己嘅手機入面。如果有用戶確診感染新型肺炎,呢個用戶就會獲發一個密碼,而該用戶喺過去14日曾進入嘅場地、到訪時間等信息,就會即時傳送予所有其他用戶。

至於「人對人」嘅警示模式就採用做低功耗藍牙無線通訊技術,如果兩個用戶喺兩米距離嘅範圍內一齊停留過一段時間,雙方嘅手機就會通過藍牙交換對方匿名嘅編碼,並保存喺各自手機數據庫入面。日後如果有用戶確診,其他用戶嘅手機就會收到確診用戶手機過去兩周內曾經發出嘅編碼,系統將會通過對比手機數據庫保存嘅編碼,從而評估接觸風險,發出警示。

呢個系統唔會收集用戶嘅任何個人資料同位置數據,用戶手機嘅匿名編碼亦會定時轉換,所有嘅接觸信息都只會存喺個人手機入面,可保障個人私隱。浸大副校長(研究及拓展)郭毅可教授表示:「我們希望透過新冠病毒風險警示系統,及時找出病毒的傳染途徑,防止疫情擴散。我們將努力與政府及有關部門合作,運用本校研發的技術回饋社會,為香港的抗疫作出貢獻。」

圖:浸會大學